MZP chuan Sairang thlenga Rel rawn lut tur chungchangah Seminar Ieh Talk Show te a lo buatsaih tawh a, MZP rorelna sang Federal Council vawi 57-na April ni 11, 2024 (Ningani) a thukhawm chuan "Sairang thlenga rel alo luh dawn avangin, Sawkarin Inner Line Permit (ILP) check dan turah ruahmanna fel fai zawk a siam theih nan MZP in hma la rawh se" ti a lo rel tawh bawhzuiin, April ni 29, 2024 khan Chief Minister, Pu Lalduhoma hnenah Inner Line Permit(ILP) chungchang rawtna thlen a ni tawh bawk, an ti.

Sairang thlenga Rel rawn lut hi MZP chuan ngun taka zirchianna a neih hnuin hnawh sarum takin India sorkar hian he station hi a hawng ringawt mai a, station a nihna tur ang la nilo tih hre reng chungin Prime Minister chu hawn tir a ni a, hei bakah hian Mizoram sawrkar la inpeih loh zia pawh chiang takin kan hmu a ni, tiin, "Heng te avang hian Mizo mipui ten harsatna kan tawk tan mek a ni," MZP chuan an ti.

Rel Station hawn ni September ni 14, 2025(Sunday) atanga October ni 7, 2025 (Thawhlehni) thlengin ILP hi 3,852 pekchhuah tawh a ni a, kutdawh thawn kir hi 6 an awm tawh bawk. Ni khat chhunga ILP pek chhuah tam ber tum hian mi 360 niin pek chhuah tlem ber tum hian mi 46 henah pek an ni a, Guwahati atanga Rel ticket Sairang thenga a full reng laia, ILP pekchhuah tlem lutuk hi MZP chuan mak ati hle a, hei hian ILP neilo a bi bo tam tak an awm tih chiang takin a lantir, an ti bawk.

MZP ten he station kan tlawh lai pawhin ILP neilo, a ruka chhuah tum mi 30 vel lai kan man chhuak nghe nghe a ni. Hei bakah hian Bairabi leh Sairang inkara station Hortoki, Kawnpui leh Mualkhang lamah pawh rel a tlan muang deuh ni a sawi awmin, tam tak an chhuk ni a hriat a ni. MZP in  zirchianna a neih lai mek hian, heng hmunah te hian police duty awm ve mahse tam tak chu ILP neilo in an chhuak ngei ang tih MZP chuan a ring tlat a ni, tiin an tarlang.

Mizorama hnamdang lo lut te hi Tourist ang veka ILP pek an ni a, an lut lam chhinchhiah ni mahse an haw lam chiang taka chhinchhiah a nilo a, hei hian Mizoram-ah awlsam taka luhna atan mi tam takin an hmang dawn tih a chiang a, cham hlen ta pawh tam tak an awm dawn tih a chiang hle a ni, tiin MZP chuan an tarlang.

MZP in Sairang Rel station a zirchianna dinhmun tlangpui ah ILP check leh pe chhuaktu Mizoram Police duty an indaih lo hle; ILP pekchhuah hi manual a tih vek anih avangin, a la fel fai tawk lo hle; CCTV engmah vuah ala awmlo; Gate mumal tak siam ala nilo; Fencing a tha tawk lo; X-Ray Baggage Scanner khawl pawh hman theih a la nilo; Mizoram hi dry state anih angin, Excise & Narcotics duty dah an nilo bawk; Parking area a fel fai lo; Station a duty zawng zawngte training pek nise, tih te a ni.

MZP chuan, Mizo hnam chimralna laka kan him tlan zawk theihna tur ngaihtuahin hma a la zel a, hnamdang rawn lutte khuahkhirhna dan khauh tak kan neih sa hi a nihna ang taka rel Station a kenkawh hi MZP duh dan a ni, an ti bawk.